Маданий мерос агентлиги ва Ўзбекистон давлат санъат музейи фаолияти билан танишув

Академияда жадал суръатларда олиб борилаётган таълим ҳамда илмий фаолият билан бир пайтда тингловчиларни мунтазам равишда турли давлат органлари ва идораларининг фаолияти билан таништирув тадбирлар ташкил этилмоқда.

Бу борада амалга оширилаётган ишлар доирасида Бош прокуратуранинг Спорт, маданият, маданий мерос ва туризм соҳаларидаги қонунчилик ижроси устидан назорат бошқармаси билан ҳамкорликда Ўзбекистон Давлат санъат музейи биносида Академиянинг магистратура ва докторантура тингловчилари учун Туризм ва маданий мерос вазирлиги ҳузуридаги Маданий мерос агентлиги раҳбари Ш.Нуруллаев билан учрашув ташкил этилди.

Агентлик раҳбари соҳада қабул қилинаётган ҳужжатлар ижросини ташкил этиш жараёни, хусусан маданий мерос объектларини аниқлаш, ҳисобга олиш, муҳофаза қилиш, давлат назоратини амалга ошириш, ЮНЕСКО ва бошқа халқаро ташкилотлар ҳужжатларининг нормалари ва тавсияларини имплементация қилиш, тарихий ва маданий объектларнинг тарихий-маданий қиммати, ноёб табиий ландшафти ва ўзига хослигини сақлаб қолиш борасида амалга оширилаётган ишлар юзасидан тингловчиларга маълумотлар берди.

Учрашув фаол мулоқот шаклида давом этди ва тингловчилар ўзларини қизиқтирган саволларга батафсил жавоб олдилар.

Музей директори В.Файзиева тингловчиларни музей экпозициясидан жой олган бой санъатимиз ва маданиятимиз намуналари билан таништириб, уларнинг ўзига хослиги ва аҳамиятини тавсифлаб берди.