“Бўлажак прокурорлар клуби” аъзолари билан учрашув ташкил этилди

Ўзбекистон Республикаси Бош прокуратураси Академияси Бош прокуратуранинг Кадрлар бошқармаси билан ҳамкорликда “Бўлажак прокурорлар клуби” фаолиятини ташкил этиш ҳамда олий юридик таълим муассасаларининг энг муносиб битирувчиларини Академия магистратурасига жалб этиш ишлари тизимли равишда олиб борилмоқда.

Жорий йилнинг 29 март куни Тошкент давлат юридик университетининг катта мажлислар залида “Бўлажак прокурорлар клуби” аъзолари билан навбатдаги учрашув бўлиб ўтди.

Ушбу клуб таркибини шакллантириш университетнинг 2-4 курс талабалари орасидан амалга оширилади. Бош прокуратура Академияси томонидан ташкил этилган танлов натижаларига кўра, клубга 143 нафар талаба қабул қилинди. Шу тариқа “Бўлажак прокурорлар клуби” иштирокчилари сони 300 нафардан ошди.

Йиғилишни университет проректори А.Ҳошимхонов кириш сўзи билан очиб, талабаларнинг назарий билимларини амалиётда мустаҳкамлашда “Бўлажак прокурорлар клуби”нинг аҳамияти ҳақида тўхталди ҳамда клубга янги қабул қилинган талабаларга муваффақиятлар тилади.

Кадрлар бошқармаси прокурори О.Султонов клубга аъзолик талабаларнинг прокуратура органларидаги келгуси фаолиятига асос бўлиб хизмат қилишини, иқтидорли ва билимли ёшларни тизимга кенг жалб этишда муҳим аҳамият касб этишини таъкидлади.

Учрашувда талабаларнинг клуб фаолияти, шунингдек Бош прокуратура Академияси магистратурасига кириш имтиҳонларини ўтказиш тартиби ва мазкур муассасада ўқишнинг афзалликларига оид саволларига жавоб берилди.

Йиғилиш якунида “Бўлажак прокурорлар клуби” аъзоларига махсус аъзолик бейджиклари топширилди.