Илмий-техник кенгашнинг навбатдаги йиғилиши бўлиб ўтди

2022 йил 21 апрель куни Ўзбекистон Республикасининг Инновацион ривожланиш вазирлиги ҳузуридаги “Ҳуқуқ” йўналиши бўйича Илмий-техник кенгашнинг навбатдаги йиғилиши бўлиб ўтди.

Мазкур Кенгаш ҳуқуқ йўналишидаги илмий лойиҳаларни экспертизадан ўтказиш мақсадида юридик фан йўналиши бўйича соҳага оид олимлар, давлат бошқаруви органлари ва ташкилотларнинг юқори малакали мутахассисларидан иборат таркибда шакллантирилган илмий-техник жамоа ҳисобланади.

Бош прокуратура Академиясининг илмий ва ахборот-таҳлилий ишлар бўйича ўринбосари, ю.ф.д., профессор М.М.Мамасиддиқовнинг раислигида ўтказилган мазкур йиғилишда Илмий-техник кенгаш аъзолари томонидан Инновацион ривожланиш вазирлиги томонидан эълон қилинган илмий фаолиятга оид давлат дастурлари доирасидаги “Юриспруденцияга боғлиқ фанлараро квантитатив тадқиқотларга мўлжалланган рақамли платформа яратиш” мавзусидаги лойиҳа муҳокама қилинди.

Муҳокама қизғин савол-жавобларга бой тарзда ўтди ва муносиб деб топилган лойиҳа молиялаштиришга тавсия этилди.