Халқаро илмий конференцияда Академия иштироки

2020 йил 26 август куни Тошкент давлат юридик университетининг таклифига асосан Бош прокуратура Академияси “Суд-тергов фаолиятида шахснинг ҳуқуқ ва эркинликларини ҳимоя қилиш кафолатларини мустаҳкамлашнинг долзарб масалалари” мавзусидаги халқаро илмий конференция ишида ҳамкор ташкилотчи сифатида иштирок этди.

Шунингдек, мазкур тадбирда Бирлашган Миллатлар Ташкилотининг Наркотиклар ва жиноятчиликка қарши курашиш бошқармаси, М.С.Нарикбаев номидаги Қозоғистон давлат юридик университетининг жиноят-процессуал тадқиқотлар ва коррупцияга қарши курашиш илмий-тадқиқот институти, Гродно давлат университети (Беларусь Республикаси), Ўзбекистон Республикаси Судьялар Олий Кенгаши ҳузуридаги Судьялар олий мактаби ҳам ҳамкор ташкилотчи сифатида иштирок этди.

Конференция Ўзбекистон Республикаси Президентининг 2020 йил 24 июлдаги "Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида"ги ҳамда 2020 йил 10 августдаги "Суд-тергов фаолиятида шахснинг ҳуқуқлари ва эркинликларини ҳимоя қилиш кафолатларини янада кучайтириш чора-тадбирлари тўғрисида"ги Фармонларининг мазмун моҳиятига бағишланди.  

Тадбир давомида иштирокчилар тергов органлари фаолиятида шахс ҳуқуқ ва эркинликларини ҳимоя қилиш кафолатларини мустаҳкамлаш, айбланувчи (гумон қилинувчи, судланувчи)ни ҳимояга бўлган ҳуқуқи билан таъминлаш, жабрланувчига ҳуқуқий ёрдам кўрсатишнинг ўзига хос хусусиятлари, айбига иқрорлик бўйича келишув институтини жорий этишнинг долзарблиги, Ўзбекистон Республикасида шахс ҳуқуқ ва эркинликларини ҳимоя қилиш кафолатларини кучайтириш нуқтаи назаридан тергов фаолиятини такомиллаштириш масалаларини муҳокама қилишди.

Халқаро иштирокчилар судгача бўлган иш юритишда шахс ҳуқуқлари ва эркинликларини таъминлаш, шунингдек, замонавий ахборот жамиятида шахс ҳуқуқлари ва эркинликларини таъминлашнинг жиноий ҳуқуқий кафолатлари бўйича тўпланган тажрибалари билан ўртоқлашдилар.

Конференция натижаси бўйича суд-тергов фаолиятида шахс ҳуқуқ ва эркинликларини ҳимоя қилишни такомиллаштириш бўйича тавсиялар берилди.

Бош прокуратура Академиясининг Тошкент давлат юридик университети билан Меморандуми доирасида ҳамкорлик давом этмоқда.