ЎЗБЕКИСТОН РЕСПУБЛИКАСИ БОШ ПРОКУРАТУРАСИ АКАДЕМИЯСИ МАГИСТРАТУРАСИГА ҚАБУЛ ДАВОМ ЭТМОҚДА

Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ–5438-сон Фармонига асосан ўқитишнинг амалий хусусиятига ва прокуратура органларининг касбий фаолияти билан узвий боғлиқликка таянган ҳолда магистратура мутахассисликлари бўйича кадрларни тайёрлаш Ўзбекистон Республикаси Бош прокуратураси Академиясининг асосий вазифаларидан бири сифатида белгиланган.

Айни вақтда 2022/2023 ўқув йили учун таълимнинг кундузги ва сиртқи шакллари бўйича Бош прокуратура Академияси магистратурасига қабул давом этмоқда. Ҳужжатлар 10 июндан 10 августга қадар онлайн тарзда Академиянинг расмий веб-сайти орқали қабул қилинади.

Магистратурага танлов “юриспруденция” таълим йўналиши бўйича таянч олий юридик маълумотга эга бўлган фуқаролар (ш.ж. прокуратура органлари ходимлари) орасида ўтказилади. Шунингдек, бошқа таълим йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари танловда иштирок этиши мумкин.

Академия магистратурасининг “Прокурорлик фаолияти”, “Тергов фаолияти”, “Коррупцияга қарши курашиш” ҳамда “Инсон ҳуқуқларига оид халқаро ҳуқуқ” йўналишлари бўйича кундузги таълим шаклида 2022/2023 ўқув йилига жами 60 та, шу жумладан 24 та давлат гранти ва 36 та тўлов-контракт асосида қабул квоталари тасдиқланган.

Шунингдек, Академияда янги ўқув йилидан эътиборан магистратурада “Прокурорлик фаолияти” мутахассислиги бўйича таълимнинг сиртқи шакли учун жами 25 та (5 та давлат гранти ва 20 та тўлов-контракт) қабул квоталари жорий қилинди.

Ушбу қабул квоталаридан прокуратура органлари ходимлари учун жами 35 та:

- кундузги таълим учун давлат гранти асосида – 20 та (ҳар бир мутахассислик бўйича 5 тадан);

- сиртқи таълим шакли учун давлат гранти асосида – 5 та, тўлов контракт асосида – 10 та ўрин ажратилган.

Очиқ танлов бўйича (ташқи номзодлар учун) квоталар сони – 50 та:

- кундузги таълим учун давлат гранти асосида – 4 та (ҳар бир мутахассисликда 1 тадан), тўлов контракт асосида – 36 та;

- сиртқи таълим шакли бўйича тўлов контракт асосида – 10 тани ташкил этади.

Магистратурага ўқишга қабул қилинган прокуратура органлари ходимларининг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинади.

Очиқ танлов бўйича давлат гранти асосида қабул қилинган тингловчиларга қонун ҳужжатларида белгиланган тартиб ва миқдорда ҳар ойлик стипендия тўланади.

Кириш имтиҳонлари мутахассислик фанлари ва чет тили бўйича ёзма имтиҳон ҳамда суҳбат шаклида август ойида ўтказилади.

Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисидаги низом билан қуйидаги ҳавола орқали танишишингиз мумкин: https://lex.uz/docs/4494360.

Бош прокуратура Академиясининг магистратурасига ҳужжат топшириш тартиби билан видеойўриқнома орқали танишиш мумкин.

Бош прокуратура Академияси магистратурасига кириш имтиҳонлари билан боғлиқ янгиликлар билан Академиянинг расмий веб-сайти (www.proacademy.uz), ижтимоий тармоқлардаги расмий саҳифалари:  www.facebook.com/ProsecutorAcademy,  www.instagram.com/proacademyuz/, “tm/ProsecutorAcademy” ҳаволаси ҳамда бошқа оммавий ахборот воситалари орқали танишиб боришингиз мумкин.

Шунингдек, магистратурага кириш билан боғлиқ маълумотларни 71-202-04-96 (ички: 1795 ва 1775) телефон рақами орқали ҳам билиб олишингиз мумкин.