Бош прокуратура Академияси профессор-ўқитувчилари учун мастер-класс ташкил этилди

Академия профессор-ўқитувчиларнинг салоҳиятини юксалтириш, педагогик маҳоратини ошириш ишлари доирасида Нью-Брансуик Университети (Канада) профессори В. Ўринов иштирокида “Силлабуснинг аҳамияти ва силлабус тайёрлаш қоидалари” мавзуcида мастер-класс ўтказилди.

Хорижий эксперт томонидан мустақил таълим натижаларини баҳолаш усуллари, ўқув жараёнини режалаштириш ва ташкил этишда силлабуснинг аҳамияти ва уни тайёрлаш қоидалари батафсил тушунтирилди.

Иштирокчилар шунингдек олий таълимда кадрлар тайёрлашда кредит-модуль тизимининг аҳамияти, талабаларнинг мустақил таълимини ташкил этиш тамойиллари, мустақил таълим турлари ва уларни танлаш мезонлари ҳақида халқаро тажриба ютуқлари билан танишдилар.

Мастер-класс интерфаол услубда ўтказилди, силлабус тайёрлаш жараёни аниқ мисоллар орқали ва бевосита иштирокчиларни жалб қилган ҳолда амалда кўрсатиб берилди.

Тадбир сўнгида В.Ўринов иштирокчиларни қизиқтирган саволларига батафсил жавоб берди.

Мазкур ишлар тизимли давом эттирилади, келгусида бундай маҳорат дарсларини онлайн шаклда ташкил этиш бўйича келишиб олинди.