Қўшма лойиҳани амалга ошириш масалалари муҳокама қилинди

Ҳуқуқни муҳофаза қилиш академиясида Академия раҳбарияти ҳамда Иқтисодий жиноятларга қарши курашиш департаменти тармоқ раҳбарларининг “Минтақавий мулоқот” ХННТ директори М.Север ва АҚШ Давлат департаменти теророризмга қарши курашиш дастурлари раҳбари Г.Мейсон билан учрашуви бўлиб ўтди.

Учрашувда томонлар “Минтақавий мулоқот” ХННТ ва АҚШ Давлат департаментининг Терроризмга қарши кураш бюроси билан ҳамкорликдаги жиноий фаолиятдан олинган даромадларни легаллаштириш ва терроризмни молиялаштиришга қарши курашиш соҳасида мураббийлик ва ўқитиш бўйича қўшма лойиҳани амалга ошириш масалаларини муҳокама қилдилар. Лойиҳа жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида техник ёрдам бериш, мураббийлик ва барқарор ўқитиш дастурини ишлаб чиқиш орқали ҳуқуқни муҳофаза қилиш органлари салоҳиятини юксалтиришга йўналтирилган.

Шунингдек томонлар келгусида ҳуқуқни муҳофаза қилувчи органлар ходимлари учун махсус малака ошириш курслари, магистратура ва бакалавриат дастурларини ташкил этиш ҳамда ўқув модулларини хорижий амалиёт асосида такомиллаштириш юзасидан фикр алмашдилар.

Ташриф давомида халқаро ҳамкорлар Академиянинг  ўқув аудиториялари, махсус полигонлар, киберлаборатория, шунингдек, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида кадрлар тайёрлаш тажрибаси билан танишдилар.