Ҳуқуқбузарликларнинг олдини олиш ва профилактика масалалари юзасидан халқаро ўқув семинари бўлиб ўтди

Ўзбекистон Республикаси Бош прокуратураси Академияси томонидан Ўзбекистон Республикаси Президентининг “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора тадбирлари тўғрисида”ги 2018 йил 8 майдаги ПФ–5438-сон Фармони ва тасдиқланган “Йўл харитаси” ижросини таъминлаш, ҳуқуқбузарлик профилактикаси ва жиноятчиликга қарши курашиш соҳасида ўзаро ҳамкорлик масалалари юзасидан давлат органлари ва бошқа ташкилотлар ходимларининг малакасини ошириш мақсадида чет эл ва халқаро таълим, илмий-тадқиқот муассасалари билан ҳамкорлик ўрнатилиб келинмоқда.

Шу боис, 2018 йил 6 август куни Бош прокуратура Академиясида ҳуқуқ соҳасидаги халқаро экспертлар ва Академиянинг профессор-ўқитувчилари жамоаси иштирокида мазкур соҳа юзасидан бир қатор чет эл мамлакатларининг илғор тажрибалари ўрганилиб, муҳокама ва мунозаралар ўтказилди.

Бундан ташқари, 2018 йил 7 август куни Ўзбекистон Республикаси Бош прокуратураси Академиясида, Лунд Университети (Швеция) ҳалқаро экспертлари иштирокида “Ҳуқуқбузарликларни олдини олиш ва профилактика масалалари: илғор тажриба алмашиш ва ҳамкорлик истиқболлари” мавзусида халқаро ўқув семинари ўтказилди.

Семинарда Лунд Университети (Швеция) ҳуқуқ социологияси кафедраси катта илмий ходими, ҳуқуқ социологияси ҳамда ҳуқуқбузарликларнинг олдини олиш соҳаси эксперти Рустам Уринбоев, Академиянинг профессор-ўқитувчилари, Бош прокуратура бошқармалари ходимлари иштирок этди.

Бундан ташқари, семинарда видеоконференцалоқа орқали Манчестер университети (Буюк Британия) профессори, Манчестер университети ҳуқуқ мактаби раҳбари Кристофер Торнхилл, Лунд Университети ҳуқуқ социологияси кафедраси катта ўқитувчиси, ҳуқуқ криминологияси фалсафа доктори Изабель Шульц, Лунд Университети ҳуқуқ социологияси кафедраси катта ўқитувчиси, Осло Университети юридик факультети криминология соҳасида фалсафа доктори Ида Нафстад, Лунд Университети ўқитувчиси Патрик Олссон иштирок этдилар.

Семинар мақсади - ҳуқуқбузарликнинг олдини олиш ва профилактика соҳасида энг яхши ҳалқаро амалиётни ўрганиш, қўшма илмий тадқиқотларни ўтказиш учун хорижий мутахассисларни жалб қилиш, норматив-ҳуқуқий, услубий ва таҳлилий характерга эга бўлган ахборот алмашинувини амалга ошириш.

Семинар жараёнида Ўзбекистоннинг ҳуқуқбузарлик профилактикаси соҳасида эришган ютуқлари ҳамда ҳозирги ва келажакдаги муаммолар, замонавий криминология масалалари ва ҳуқуқбузарликнинг олдини олиш амалиёти, жойларда ҳуқуқбузарликнинг олдини олиш соҳасида инновацияларни қўллаш амалиёти масалалари муҳокама қилинди.     

Семинар конструктив ва дўстона муҳитда ўтди. Томонлар фикр алмашиб, келгусида мазкур соҳадаги ҳамкорликни давом эттириш ва ривожлантиришни тасдиқлаб ўтдилар.