«Давлат бошқаруви органлари ходимларининг одоб-ахлоқ намунавий қоидаларига оғишмай риоя этиши» мавзусида амалий семинар ўтказилди

Ўзбекистон Республикасининг “Коррупцияга қарши курашиш тўғрисида”ги Қонуни ҳамда Вазирлар Маҳкамасининг 2016 йил 2 март кунги қарори билан тасдиқланган Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидаларига биноан, давлат органлари хизматчиларининг одоб-ахлоқ қоидаларига оғишмай риоя этиш давлат бошқаруви соҳасида коррупциянинг олдини олишга доир чора-тадбирлардан бири ҳисобланади.

Айнан ушбу мавзуга бағишлаб, жорий йилнинг 10 сентябрь куни Ўзбекистон Республикаси Бош прокуратураси томонидан Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Абу Райҳон Беруний номидаги Бизнес ва бошқарув республика олий мактаби билан ҳамкорликда амалий семинар ташкил қилинди.

Тадбирда Бизнес ва бошқарув олий мактаби ходимлари ва профессор-ўқитувчилари, Лойиҳа бошқаруви миллий агентлиги, Давлат тест маркази, ТИА “Миллий банки” вакиллари иштирок этдилар.

Семинарни ўтказишдан мақсад давлат хизматчилари ва хўжалик юритувчи субъектлар мансабдор шахсларига одоб-ахлоқ қоидаларига риоя этиш, хизматда манфаатлар тўқнашувини олдини олиш, шунингдек коррупцияга оид ҳуқуқбузарликларнинг барвақт профилактикаси юзасидан қонунчилик талабларини тушунтиришдан иборат.

Интерфаол шаклда ўтказилган тадбир жараёнида Бош прокуратура Академияси ходимлари ва профессор-ўқитувчилари ҳамда таклиф этилган Академия профессори Грегори Уэдл (АҚШ) томонидан тадбир иштирокчилари билан ҳамкорликда давлат хизмати тизимида ва хўжалик субъектлари фаолиятида манфаатлар тўқнашуви ҳолатларини олдини олиш бўйича амалий чора-тадбирлар ишлаб чиқилди.

Тадбир иштирокчилари амалий семинарнинг давлат хизматчилари ва хўжалик юритувчи субъектлар ходимлари ўртасида одоб-ахлоқ қоидалари ва манфаатлар тўқнашуви ҳолатларига йўл қўймасликни таъминлаш мақсадида фикрлар ва энг яхши тажрибаларни алмашиш учун муҳим аҳамият касб этганлиги эътироф этилди.