Бош прокуратура Академияси ва Франция Республикаси Магистратлар миллий мактаби вакиллари ўртасида учрашув

Бош прокуратура Академияси томонидан юридик кадрларни тайёрлаш, қайта тайёрлаш ва малакасини ошириш тизимини такомиллаштириш борасида Франция Республикаси билан ҳамкорликни мустаҳкамлаш ишлари олиб борилмоқда.

Шу муносабат билан жорий йилнинг 21 сентябрь куни Париж шаҳрида Ўзбекистон Республикаси Бош прокуратураси Академияси ва Франция Республикаси Магистратлар миллий мактаби вакиллари ўртасида учрашув бўлиб ўтди.

Учрашув давомида икки томон вакиллари жорий йилнинг июль ойида имзоланган ҳамкорлик тўғрисидаги битим доирасида келгусида олиб бориладиган ўзаро фаолият масалаларини муҳокама қилишди.

Шунингдек, томонлар Академия ходимлари учун ўқув курсларини ташкил этиш, электрон таълимни йўлга қўйиш ва педагогик маҳоратни ошириш бўйича вебинарлар ташкил қилиш ва бошқа шу каби масалалар юзасидан ўзаро фикр алмашишди.