Талабалар дебат клуби “Инсон ҳуқуқлари уйи”да иш бошлади

Ҳуқуқни муҳофаза қилиш академияси ва Инсон ҳуқуқлари бўйича Ўзбекистон Республикаси Миллий маркази ўртасида 2019 йил 16 май куни имзоланган ўзаро ҳамкорлик тўғрисида меморандум асосида Академиянинг бакалавриат талабалари учун Инсон ҳуқуқлари бўйича Миллий марказ ҳузуридаги “Инсон ҳуқуқлари уйи”да мутахассислар иштирокида дебат клубига старт берилди.

Дебат клубининг “Инсон ҳуқуқлари ва сиёсатшунослик” мавзусига бағишланган илк сонини Инсон ҳуқуқлари бўйича Ўзбекистон Республикаси Миллий маркази директори, академик А.Х.Саидов кириш сўзи билан очиб берди ва талабаларга муваффақиятлар тилаб, илмий одобга асосланган бу каби мунозаралар уларнинг юридик соҳадаги билим ва кўникмаларни янада мустаҳкамлашга хизмат қилишига ишонч билдирди.

Тадбир иштирокчилари мазкур форматдаги мулоқот таълим сифатини ошириш ва талабаларнинг назарияни амалиёт билан узвий боғлиқ равишда олиб боришларини таъминлашда муҳим аҳамият касб этишини алоҳида таъкидлаб ўтдилар.

Мазкур дебат клуби анъанавий тарзда ҳафтанинг ҳар жума кунлари муайян мавзуларда бўлиб ўтадиган бўлди ва юртимизнинг барча юридик олийгоҳлари талабаларини ушбу платформада бирлаштиришни ўз олдига мақсад қилиб қўйди.