Солиқлар ва божхона тўловларининг йиғилувчанлигини ошириш масалаларига бағишланган ўқув семинари ўтказилди

Бош прокуратура Академиясида Ўзбекистон Республикаси Президентининг 2018 йил 2 августдаги “Ўзбекистон Республикасида амалга оширилаётган солиқ ва божхона ислоҳотларини ҳуқуқий қўллаб-қувватлаш чора-тадбирлари тўғрисида”ги ПФ-5499-сонли Фармони ижросини таъминлаш масалаларига бағишланган видеоконференцалоқа режимида навбатдаги ўқув семинари ўтказилди.

Тадбирда Бош прокуратура, Давлат солиқ қўмитаси, Давлат божхона қўмитаси ходимлари, шунингдек, солиқ ва божхона соҳаларидаги қонунчилик ижроси устидан назоратни амалга ошириш учун масъул Қорақалпоғистон Республикаси, вилоятлар, Тошкент шаҳар ҳамда туман (шаҳар) прокурорларининг ўринбосарлари иштирок этди.

Семинарда бюджетнинг даромад қисмини ошириш, божхона тўловларини йиғишда заҳира омилларни аниқлаш, товарларнинг божхона расмийлаштирувини тезлаштириш, ташқи савдо операцияларини мониторинг қилиш, экспорт-импорт шартномалари ижросини таҳлил қилиш, шунингдек, ташқи савдо операциялари ўтказилишида валюта қонунчилигига қатъий амал қилинишини таъминлашнинг долзарб масалалари атрофлича муҳокама қилинди.

Шунингдек, тадбирда берилган солиқ ва божхона имтиёзларидан мақсадли фойдаланилишини мониторинг ва назорат қилиш, солиқ ва божхона тўловларини тўлашдан бўйин товлаш ва улардан қочиш ҳолатларини олдини олиш, мазкур соҳада ҳуқуқни муҳофаза қилувчи органлар билан ўзаро ҳамкорликни ва ахборот алмашинувини мақбуллаштириш бўйича тегишли тавсиялар берилди.

Иштирокчилар ўзларини қизиқтирган саволларга батафсил жавоб олдилар.