“Crypto Week Uzbekistan” мавзусида халқаро конференция ўтказилди

Ўзбекистон Республикаси Ҳуқуқни муҳофаза қилиш академияси томонидан Истиқболли лойиҳалар миллий агентлиги, “Heemera” ва “PraeLegal Uzbekistan” ташкилотлари билан биргаликда ҳуқуқни муҳофаза қилувчи орган ходимлари учун “Crypto Week Uzbekistan” номли халқаро конференция ташкил этилди.

Ушбу конференцияда халқаро экспертлардан Crystal Blockchain компанияси ҳамкорлик бўлими раҳбари Артем Семко ва ушбу компаниянинг савдо бўйича катта мутахассиси Елена Агеёнок ҳамда Trezor (USDT) компанияси вакили Murad Zada иштирок этишди.

Конференция давомида қатнашчилар крипто-активлар айланмаси соҳасида тергов ҳаракатларини олиб бориш, крипто-активларни музлатиш, хатлаш ва қайтариш билан боғлиқ масалалар муҳокама қилинди. Шунингдек, маълумотларнинг тақсимланган реестри (блокчейн) таҳлили, махсус қидирув тизимлари ёрдамида крипто-активлар оқимини кузатишда алоҳида этибор бериладиган ҳолатлар бўйича фикрлар билдирилди.

Тадбир якунида Истиқболли лойиҳалар миллий агентлиги, “PraeLegal Uzbekistan” халқаро адвокатлик фирмаси, Crystal Blockchain ва Trezor (USDT) компанияси вакилллари ва конференция қатнашчилари ўртасида крипто-активлар билан боғлиқ жиноятларда крипто-биржаларга сўровлар юбориш, крипто-ҳамёнлар ўртасидаги боғлиқликларни таҳлил қилиш ва крипто-активларни музлатиш ҳамда қайтариш юзасидан қизғин муҳокамалар бўлиб ўтди.