Белорусь Бош прокуратураси вакиллари иштирокида давра суҳбати ўтказилди

Бош прокуратурада 23 октябрь куни коррупцияга, иқтисодий фаолиятни амалга оширишга қарши қаратилган жиноятлар, одам савдоси ва ноқонуний миграция билан боғлиқ жиноят ишлари бўйича жиноий таъқибни амалга ошириш ва судларда давлат айбловини қувватлашнинг муҳим масалалари юзасидан давра суҳбати ўтказилди. 

Тадбирда Белорусь Республикаси ва Ўзбекистон Республикаси Бош прокуратуралари, шунингдек Бош прокуратура Академияси вакиллари иштирок этишди.

Давра суҳбати ҳар икки мамлакат Бош прокуратуралари ўртасида Ҳамкорлик Келишуви ва 2018-2019 йиллар учун Ҳамкорлик Дастури доирасида ташкил этилган.

Давра суҳбати давомида иштирокчилар коррупцияга қарши кураш, тадбиркорлик фаолиятини ҳимоя қилиш, шунингдек одам савдоси ва ноқонуний миграция билан боғлиқ жиноятларни олдини олиш соҳасидаги миллий тажрибалар билан ўзаро фикр алмашдилар.

Мазкур тадбир жиноятчиликка қарши курашда муҳим масалаларни муҳокама қилиш ва ўзаро тажриба алмашиш учун имкон берди.