Ҳуқуқни муҳофаза қилиш академиясида магистратура битирувчиларига дипломлар топширилди

Ҳуқуқни муҳофаза қилиш академияси магистратурасини 2023/2024 ўқув йилида тамомлаган магистрларга “Ҳуқуқ магистри” дипломларини топшириш маросими ўтказилди.

Тантанали тадбирда Бош прокуратура ва Академия вакиллари, магистратура битирувчилари ва уларнинг ота-оналари, В вакиллари иштирок этдилар.

Тадбирда сўзга чиққанлар Академиянинг навбатдаги магистрларини Бош прокуратура ва Академия раҳбарияти номидан самимий табрикладилар.

Академияда ўқув дастурлари прокурор-тергов ва таҳлилий ишларни олиб бориш, норма ижодкорлиги фаолиятида иштирок этиш, шунингдек, ишни ташкил этишнинг инновацион шакл ва усулларини ҳамда бошқарув асосларини ўзлаштириш бўйича касбий билим ва кўникмаларни чуқурлаштиришга қаратилгани, машғулотлар ҳам мазмунан, ҳам илмий-методик жиҳатдан янгича ёндашувлар асосида, илғор педагогик ва ахборот технологияларидан, хорижий инновацион тажрибалардан фойдаланган ҳолда ташкил этилгани қайд этилди. Ўқув жараёнида профессор-ўқитувчилар билан бир қаторда миллий ва хорижий экспертлар, Парламент, вазирликлар, идоралар, илмий, таълим муассасалари ва жамоат ташкилотлари вакиллари иштирок этгани натижасида битирувчиларнинг илмий-тадқиқот ишлари етук мутахассис олимлар томонидан юқори баҳолангани алоҳида қайд этилди.

Мамлакатимизда муҳтарам юртбошимизнинг ташаббуслари билан ёш авлодни муносиб тарбиялаш, Янги Ўзбекистоннинг мустаҳкам пойдеворини яратиш йўлида амалга оширилаётган кенг қамровли ислоҳотлар доирасида Ҳуқуқни муҳофаза қилиш академиясининг камтарона ҳиссаси экани таъкидланди.

Шундан сўнг, Академияни муваффақиятли тамомлаган 139 нафар ёшларга “Ҳуқуқ магистри” дипломи топширилди.

Тадбирда Академиянинг битирувчилари ва уларнинг ота-оналари сўзга чиқиб, ушбу таълим даргоҳида ёшлар учун илмий фаолият олиб бориш борасида яратилган шароит ва имкониятларни юқори баҳолаб, Бош прокуратура ҳамда Академия раҳбарияти, профессор-ўқитувчиларига чуқур миннатдорчилик изҳор қилдилар.