Ҳамкорлик тўғрисида меморандум имзоланди

Бош прокуратура Академияси ҳамда Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти ўртасида ҳамкорлик Меморандумини имзолашга бағишланган тадбир ўтказилди.

Унда Ўзбекистон Республикаси Олий Мажлиси Қонунчилик палатаси депутатлари, Бош прокуратура Академияси ходимлари ва тингловчилари, Қонунчилик муаммолари ва парламент тадқиқотлари институти ходимлари иштирок этди.

Томонлар норма ижодкорлигини такомиллаштириш, қонунчилик муаммолари ва ҳуқуқни қўллашнинг долзарб масалалари бўйича тадқиқотларни амалга ошириш, биргаликда давра суҳбатлари, жамоатчилик муҳокамалари, ижтимоий сўровномалар ва бошқа шаклларда тадбирларни ташкил этишда ҳамкорлик қилишга келишиб олдилар.

Қонун чиқарувчи ҳамда прокуратура органларининг илмий-тадқиқот муассасалари ўртасида ҳамкорликнинг ўрнатилиши қонунларнинг янада таъсирчан ва самарадор бўлишига хизмат қилади.