“Судларда маъмурий, фуқаролик ва иқтисодий ишлар кўрилишида шахс ҳуқуқларини ҳимоя қилиш” малака ошириш курси

Академияда Бош прокурор томонидан ўқув жараёнини прокуратура органларининг касбий фаолияти билан узвий боғлиқлигини таъминлашга оид белгиланган вазифалар ижроси доирасида Ихтисослаштирилган прокурорлар корпусининг туман (шаҳар) прокурорлари ва уларга тенглаштирилган прокурорлари ёрдамчилари иштирокида “Судларда маъмурий, фуқаролик ва иқтисодий ишлар кўрилишида шахс ҳуқуқларини ҳимоя қилиш” мавзусида малака ошириш курси ўтказилмоқда.

Курс дастури доирасида шахс ҳуқуқлари ва қонуний манфаатларини суд орқали ҳимоя қилиш, маъмурий судлар ҳамда иқтисодий ва фуқаролик ишлари бўйича судларда ишларни кўриш ҳусусиятлари ва унда прокурор иштирокининг долзарб масалалари қамраб олинган бўлиб, тингловчиларнинг мазкур йўналишлардаги назарий билим ва кўникмаларини мустаҳкамлашга қаратилган машғулотлардан таркиб топган.

Ўқув машғулотлари давомида мамлакатимизда амалга оширилаётган суд-ҳуқуқ ислоҳотлари шароитида амалдаги қонунчиликка киритилаётган янгиликлар, шахс ҳуқуқларини суд орқали самарали ҳимоя қилишни таъминлаш масалалари, амалиётда мавжуд бўлган муаммолар ва уларнинг ечими билан боғлиқ масалалар ёритилади.

Тасдиқланган дастур асосида ўтказилаётган ўқитишнинг масофавий шаклида ҳар ўқув ҳафтасининг якуни бўйича ташкиллаштирилиши назарда тутилган синхрон ўқув машғулотлари давомида ҳафталик ўзлаштиришни мониторинг қилиб бориш билан бирга, амалдаги қонунчилик талаблари ҳамда мавзу доирасидаги саволларга тушунтириш бериб борилмоқда.

Малака ошириш курсининг якуний босқичида эса тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида тренинг ҳамда ўқитишнинг интерфаол услубларидан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланиб, тингловчиларнинг курс дастурини ўзлаштириш даражаси баҳоланади.

Курс аввалида тингловчиларига суд-прокурор амалиётидаги долзарб масалалар тақсимланган ҳолда мустақил ўрганишлар ўтказиш ва курс натижалари бўйича лаборатория иши доирасида тақдимот ҳимоясига тайёрланиш вазифаси қўйилди.

Малака ошириш курси ўқув дастурининг ўтказилиш тартиби ҳамда амалий топшириқларни бажариш қоидалари юзасидан тингловчиларга видеоконференцалоқа воситасида тушунтиришлар берилган бўлиб, тингловчиларнинг Академия билан узлуксиз алоқада бўлиш имкониятларини таъминлаш чоралари кўрилган.