Академия талабалари халқаро олимпиадада муваффақиятли иштирок этдилар

Академия талабаларидан иборат Ўзбекистон жамоаси 2024 йилнинг 30 сентябрь – 4 октябрь кунлари Сириус федерал ҳудудида (Россия Федерацияси) ўтказилган Молиявий хавфсизлик бўйича IV халқаро олимпиадада муваффақиятли иштирок этиб қайтди.

Олимпиаданинг финал босқичида 36 та мамлакат жамоалари таркибида 449 нафар талаба иштирок этди. Ўзбекистон жамосидан 4 нафар талаба ғолибликни қўлга киритдилар, шу жумладан, Академиянинг 3-курс талабаси Сабина Қахрамонова “Халқаро муносабатлар” йўналиши бўйича олимпиада ғолиби бўлди.

Давлатлар миқёсида (36 давлат) Олимпиада тадбирлари натижасига кўра, Ўзбекистон вакиллари жамоавий ҳисобда фахрли 3-ўринни эгаллашди.

Талабаларимиз олимпиада дастури доирасида ўтказилган тренинг, мастер-классларда фаол иштирок этиб, улар “Энг яхши тўғри жавоб”, “Энг фаол иштирокчи”, “Энг кўп тўғри жавоблар” номинацияларида ғолибликни қўлга киритдилар.

Халқаро олимпиадада талабаларнинг муносиб иштирок этишини таъминлаш мақсадида Академия “Минтақавий мулоқот” ХННТнинг Тошкентдаги ваколатхонаси кўмагида халқаро эксперт Ричард Джозеф Джойс (АҚШ) иштирокида махсус ўқув дастурини амалга оширди. Назарий билимлардан ташқари, талабаларга амалий материаллар ва ҳақиқий олимпиада форматини тақлид қилувчи тестлар тақдим этилди, бу эса, ўз навбатида мусобақага пухта тайёргарлик кўриш имконини берди.