Бош прокуратура Академиясида «Қийноқларга қарши БМТ Конвенцияси: халқаро амалиёт ва Ўзбекистон тажрибаси» мавзусида семинар-тренинг бўлиб ўтди

25 октябр куни Бош прокуратура Академиясида БМТнинг қийноқ ва бошқа шавқатсиз ёки қадр-қимматни камситувчи муомала ва жазоларга қарши Конвенциясини имплементацияси бўйича Ўзбекистон тажрибаси ва халқаро амалиётга бағишланган семинар бўлиб ўтди.

Тадбир Ўзбекистон Республикаси Инсон ҳуқуқлари бўйича Миллий маркази ва БМТнинг Ўзбекистондаги Тараққиёт дастури билан ҳамкорликда ташкиллаштирилган.

Семинар давомида Дания институтининг эксперти И.Пус ушбу халқаро ҳужжатнинг аҳамияти ҳақида тақдимот қилиб, Конвенция ва унинг Факультатив баённомаси қоидаларини амалга оширишни хориж тажрибаси билан таништирди.

Иштирокчилар қийноқ ва бошқа шавқатсиз ёки қадр-қимматни камситувчи муомала ва жазолашнинг олдини олиш ва уларни бартараф этишда Ўзбекистоннинг аниқ чора-тадбирларни амалга ошириш тажрибаси билан алмашдилар. Айниқса, Ўзбекистон Республикаси Президентининг 2017 йил 30 ноябрдаги “Суд-тергов фаолиятида фуқароларнинг ҳуқуқ ва эркинликлари кафолатларини кучайтириш бўйича қўшимча чора-тадбирлар тўғрисида”ги Фармонига мувофиқ, ноқонуний усуллардан олинган далиллардан фойдаланишга йўл қўйилмаслигини таъминловчи муайян механизмлар назарда тутилганлиги таъкидланди.