Амалий бинар маҳорат дарсларига старт берилди

Ҳуқуқни муҳофаза қилиш академияси талабаларининг касбий ва жисмоний тайёргарлиги бўйича билим, кўникма ва малакаларини шакллантириш ва ривожлантириш мақсадида Ўзбекистон Республикаси куч тузилмалари ва ҳуқуқни муҳофаза қилувчи органларининг амалиётчи ходим ва ҳарбий хизматчи мутахассислари билан ҳамкорликда машғулотлар ташкилаштириш масалаларига алоҳида эътибор берилмоқда.

Хусусан, Миллий гвардиянинг Тошкент минтақавий ўқув маркази ҳарбий хизматчиси подполковник Умурзаков Илхом Исломович иштирокида 1-босқич талабалари билан “Ҳарбий ва жисмоний тайёргарлик” модули доирасида “Отиш тайёргарлиги” фани бўйича амалий мастер-класс машғулотлари ўтказилди.

Машғулотлар мобайнида талабалар “Ўқотар қуроллардан отиш қоидалари” мавзуси доирасида ўқ отишнинг вазифаси, унинг бажариш кетма-кетлиги, ўқ узишнинг моҳияти, усуллари ва турлари, ҳар қандай оғир шароитларда ҳамда ҳаракатланувчи нишонларга қарата ўқ отиш қоидалари бўйича билим ва амалий кўникмаларга эга бўлишдилар.

Мутахасис томонидан талабаларга отиш асослари ва қоидалари ҳамда шулар каби бошқа уларни қизиқтирган саволлар бафуржа тушунтириб берилди.