“Law Talks” дискуссия клубининг навбатдаги йиғилиши ўтказилди

2018 йил 26 октябрь куни Бош прокуратура Академиясида “Law Talks” дискуссия клубининг йиғилиши ташкил этилди.

Тадбирда Тошкент шаҳридаги фуқаролик ва жиноят ишлари бўйича судларнинг судьялари, Олий Мажлис ҳузуридаги қонунчилик муаммолари ва парламент тадқиқотлари институти, Ички ишлар вазирлигининг Тергов департаменти, Ёшлар иттифоқи, ТДЮУ вакиллари, шунингдек Бош прокуратура Академияси профессор-ўқитувчилари иштирок этдилар.

Йиғилишда “Региональный диалог” ХННТ эксперти Г.Уэддл, Швециянинг Лунд университети профессори П.Олссон ва Хельсинки университети доценти, “Буюк келажак” ХННТ эксперти Р.Ўринбоевлар халқаро эксперт сифатида қатнашдилар.

Тадбир иштирокчилари норасмий доирада самарали ташкилий-ҳуқуқий чораларни қўллаш орқали фирибгарлик даражасини пасайтириш йўлларини муҳокама қилдилар, фирибгарлик турлари ва унга сабаб бўлувчи асосий омиллар, мазкур жиноятни содир қилиш ҳолатларининг кўпайиш тенденцияларини кўриб чиқдилар. Бу борада АҚШ ва Швеция тажрибалари экспертлар томонидан тақдим этилди.

Дискуссия клубининг навбатдаги йиғилиши жорий йилнинг 30 ноябрида “Давлат хизматчиларининг даромадлари ва мулкларини декларация  қилиш механизмини жорий этиш орқали коррупцияга қарши курашиш” мавзусида ўтказилиши режалаштирилди.