Полигон шароитида амалий ва касбий маҳоратни мустаҳкамлаш

Ҳуқуқни муҳофаза қилиш академияси тингловчилари учун магистратура ўқув дастури доирасида Ички ишлар вазирлиги кўмагида полигон шароитида ўқув ва амалий сайёр машғулотлар ташкил этилди.

Тадбирларнинг асосий мақсади дала шароитида ўқув машғулотларини ўтказиш, тингловчилар томонидан жанговар, саф ва жисмоний тайёргарлик асосларини ўзлаштириш ҳисобланади.

Полигонда тегишли фанлар бўйича таълим олишни узлуксиз давом эттирилиб, Академия профессор-ўқитувчилари томонидан сайёр ўқув машғулотлари ўтказилди. Ўқув машғулотлари давомида тингловчилар тажрибали устозлар раҳбарлиги остида ҳақиқий ҳолатга яқин бўлган вазиятда турли тергов ҳаракатларини амалга ошириш ва криминалистика соҳасидаги касбий кўникмаларини мустаҳкамлаш имкониятига эга бўлдилар.

Тингловчилар ўз билим ва салоҳиятини янада ошириш мақсадида полигондаги мавжуд электрон кутубхона, спорт машғулотлари билан шуғулланиш учун тегишли спорт мажмуаларидан самарали фойдаландилар.

Дала шароитидаги ўқув-амалий машғулотлари Академия магистратураси тингловчиларида ўзаро дўстона муносабатни шакллантиришга, жамоавий руҳни мустаҳкамлашга ҳамда улар орасида самарали тажриба алмашинувини амалга оширишга хизмат қилади.