Саудия Арабистони подшоҳлиги Бош прокурори бошчилигидаги делегациянинг ташрифи

Жорий йилнинг 7 ноябрь куни Ҳуқуқни муҳофаза қилиш академиясига Саудия Арабистони подшоҳлиги Бош прокуратурасининг шайх Сауд ибн Абдуллоҳ Ал-Муажиб бошчилигидаги делегация вакилларининг ташрифи амалга оширилди.

Ташриф давомида делегацияга Aкадемиянинг тузилмаси ва асосий фаолият йўналишлари, прокуратура ва тергов органлари ходимларини тайёрлаш, қайта тайёрлаш ва малакасини оширишни ташкил этиш тизими ҳамда ўқув жараёни тўғрисида батафсил маълумот берилди.

Учрашув конструктив руҳда ўтиб, Саудия Арабистони Бош прокурори Академия фаолияти унда катта таассурот қолдирганини таъкидлади. Меҳмонлар келгусида ўзаро ҳамкорликни йўлга қўйиш ва мустаҳкамлаш бўйича ташаббусларни илгари сурдилар.

Шунингдек, делегация вакиллари Академиянинг моддий-техник базаси, тингловчилар учун яратилган шарт-шароитлар, амалий кўникмаларни ўзлаштиришга қаратилган инфратузилма, таълим жараёнида қўлланилаётган замонавий технологиялар, Рақамли криминалистика илмий-тадқиқот Институти фаолияти, юридик клиника, криминалистик полигон, лабораториялар, суд имитацияси хонаси ва бошқа амалий машғулотлар ўтказишга мўлжалланган махсус хоналар, шунингдек, ахборот-ресурс маркази фаолияти билан танишдилар.

Академиянинг илм-фан, таълим ва амалиётнинг ўзаро уйғунлигига асосланган таълим фаолияти меҳмонларда катта қизиқиш уйғотди. Томонлар кадрларни тайёрлаш, қайта тайёрлаш, ҳамда Саудия Арабистони прокуратураси ходимларининг малакасини оширишга қаратилган таълим дастурларини амалга ошириш йўналишида ҳамкорлик қилишга келишиб олдилар.