Санкт-Петербург давлат университети билан ҳамкорлик мустаҳкамланмоқда

Ҳуқуқни муҳофаза қилиш академиясида Санкт-Петербург давлат университети (Россия) вакиллари билан учрашув бўлиб ўтди.

Меҳмонлар Академия фаолиятининг асосий йўналишлари, прокурор-тергов кадрларини тайёрлаш, қайта тайёрлаш ва малакасини ошириш жараёнида қўлланилаётган замонавий таълим методикалари ва илғор ахборот-коммуникация технологиялари, шунингдек Академия таълим инфратузилмаси билан яқиндан танишиб чиқдилар.

Тадбир доирасида Академия ва Санкт-Петербург давлат университети ўртасида ўзаро ҳамкорлик тўғрисидаги меморандум имзоланди. Ушбу ҳужжат икки томонлама муносабатларни мустаҳкамлаш ва узоқ муддатли ҳамкорлик учун муҳим қадам ҳисобланади. Меморандумда қўшма илмий лойиҳаларни амалга ошириш, таълим дастурларини ташкил қилиш ва илмий тадбирлар, шунингдек, академик ва илмий алмашинувни ривожлантириш кўзда тутилган.

Санкт-Петербург давлат университети – Россиянинг энг қадимги университетларидан бири бўлиб, жорий йилда ўзининг 300 йиллик юбилейини нишонламоқда. Университет 81 давлатдаги 500 дан ортиқ университет билан ҳамкорлик ўрнатган бўлиб, кенг турдаги таълим ва илмий дастурларни таклиф қилади.

Учрашувда томонлар келгусидаги ҳамкорликнинг асосий йўналишларини ва устувор соҳаларини белгилаб олдилар. Бу эса ҳамкорлик муносабатларини мустаҳкамлаш ва умумий мақсадларга эришишга хизмат қилади.