Молиявий мониторинг халқаро ўқув-услубий маркази раҳбарияти билан учрашув бўлиб ўтди

Жиноий даромадларни легаллаштириш ва терроризмни молиялаштиришга қарши курашиш бўйича Евроосиё гуруҳининг 41-ялпи ҳафтаси доирасида Ўзбекистон Республикаси Ҳуқуқни муҳофаза қилиш академияси раҳбариятининг Молиявий мониторинг халқаро ўқув-услубий маркази раҳбарияти ўртасида учрашув бўлиб ўтди.

Суҳбат чоғида томонлар жиноий даромадларни легаллаштириш ва терроризмни молиялаштиришга қарши курашиш соҳасида кадрлар тайёрлаш бўйича ўзаро ҳамкорлик ҳолати ва истиқболлари муҳокама қилдилар.

Хусусан, талабаларни молиявий хавфсизлик бўйича ҳар йили ўтказиладиган халқаро олимпиадада иштирок этишга тайёрлашда Ҳуқуқни муҳофаза қилиш академияси ва Жиноий даромадларни легаллаштириш ва терроризмни молиялаштиришга қарши курашиш халқаро тармоқ институти таркибига кирувчи олий ўқув юртлари тренер-ўқитувчиларининг ўрни қайд этилди.

Шунингдек, Молиявий мониторинг халқаро ўқув-услубий маркази Бош директори И.А.Уваров Ҳуқуқни муҳофаза қилиш академияси бошлиғининг биринчи ўринбосари Е.В.Коленкони Академия ташкил этилганининг икки йиллиги билан табриклаб, Ўзбекистон томонига “Особенности национальных систем ПОД/ФТ государств Евразийского региона. Республика Узбекистан” ўқув қўлланмасини тақдим этди.

Қўлланма Ўзбекистон ихтисослаштирилган олий ўқув юртлари профессор-ўқитувчилари, молиявий разведка ходимлари ҳамда Молиявий мониторинг халқаро ўқув-услубий маркази ўртасидаги ҳамкорлик доирасида ишлаб чиқилган ва нашр этилган.

Томонлар ушбу йўналиш бўйича турли ўқув қўлланмалари ва дарсликларини ишлаб чиқишнинг жиноий даромадларни легаллаштириш ва терроризмни молиялаштиришга қарши курашиш соҳасида кадрлар салоҳиятини оширишдаги ўрни ва аҳамиятини алоҳида таъкидлаб ўтдилар.