Идоралараро ҳамкорлик кенгаймоқда

Ўзбекистон Республикаси Ҳуқуқни муҳофаза қилиш академияси ҳуқуқни муҳофаза қилиш соҳаси учун замонавий талабларга жавоб берадиган малакали кадрларни тайёрлаш борасидаги салоҳиятни ошириш мақсадида республикамизнинг етакчи таълим ва илмий-тадқиқот муассасалари билан идоралараро ҳамкорликни мустаҳкамлаш бўйича изчил ишларни амалга ошириб келмоқда.

Академия бошлиғининг биринчи ўринбосари Е.В.Коленко Ўзбекитсан Республикаси Ички ишлар вазирлиги академияси томонидан ташкил этилган “Қийноққа солишга қарши курашиш: халқаро амалиёт ва миллий тажриба” мавзусидаги халқаро илмий-амалий конференцияда маъруза билан иштирок этди.

Халқаро илмий-амалий конференция доирасида Ўзбекистон Республикаси Ички ишлар вазирлиги академияси ва Ўзбекистон Республикаси Ҳуқуқни муҳофаза қилиш академияси ўртасида ўзаро ҳамкорлик меморандуми имзоланди.

Меморандум академиялар ўртасида таълим, илмий-тадқиқот ва эксперт-таҳлилий йўналишларида ўзаро ҳамкорлик муносабатларини янада кенгайтириш ва мустаҳкамлашга хизмат қилади.

Ҳужжатда ҳуқуқбузарликлар профилактикаси, кибержиноятларга, коррупцияга ва бошқа замонавий таҳдидларга қарши курашиш борасида  ҳуқуқни муҳофаза қилиш соҳаси кадрларининг салоҳиятини оширишга қаратилган қўшма илмий тадқиқотлар ва ўқув дастурларини ҳамкорликда амалга ошириш назарда тутилган.