Академия вакиллари Туркий Суд-ҳуқуқ таълими тармоғи халқаро конференциясида иштирок этдилар

Ҳуқуқни муҳофаза қилиш академиясининг вакиллари Озарбайжон Республикаси Боку шаҳрида ўтказилган “Ҳуқуқий муносабатларнинг трансмиллий жиҳатлари: замонавий чақириқ ва мақсадлар” мавзусидаги халқаро конференцияда иштирок этишди.

Ушбу халқаро конференцияда бир қатор давлатларнинг вакиллари, шунингдек Озарбайжон Республикаси Бош прокурори, адлия вазири, Конституциявий суд ва Олий суд, Адвокатлар ҳайъати раислари иштирок этдилар.

Туркий тилларда сўзлашувчи давлатларнинг суд ва ҳуқуқни муҳофаза қилувчи органлари ҳамда таълим муассасалари вакиллари ўз маърузалари билан қатнашдилар.

Тадбирда Академия вакиллари “Трансмиллий жиноятлардан жабр кўрганлар ва уларни фуқаровий-ҳуқуқий ҳимоя қилиш механизмлари” ҳамда “Ўзбекистонда тадбиркорлик соҳасидаги қонунчилик ва тадбиркорларни ҳуқуқий ҳимоя қилиш” мавзусида маъруза билан иштирок этишди.

Шунингдек конференция иштирокчиларининг Озарбайжон Бош прокуратурасига, Бош прокуратура Илмий-ўқув марказига ва бошқа диққатга сазовор жойларга ташрифи амалга оширилди.