Академия томонидан республикада биринчи “Катта ҳажмдаги маълумотларни ("BigData") тадқиқ қилиш ва таҳлил этиш” услубиёти ишлаб чиқилди

Ўзбекистон Республикаси Адлия вазирлиги ҳузуридаги Х.Сулаймонова номидаги Республика суд экспертизаси маркази Суд экспертизалари илмий-тадқиқот институтининг Идоралараро илмий-услубий кенгашининг навбатдаги мажлиси бўлиб ўтди.

Идоралараро кенгашда Адлия вазирлиги, Электрон технологияларни ривожлантириш маркази, ИИВ Бош эксперт-криминалистика маркази, Соғлиқни сақлаш вазирлигининг Республика суд-тиббий экспертиза илмий-амалий маркази, Мудофаа вазирлигининг Суд-тиббий экспертизалар маркази, ДХХ Эксперт-криминалистика бўлими, ФВВ Ёнғин хавфсизлиги ва фавқулодда вазиятлар муаммолари илмий-тадқиқот институти, Х.Сулаймонова номидаги Республика суд экспертизаси маркази, Тошкент давлат юридик институти ва бошқа ташкилотлар вакиллари иштирок этдилар.

Мажлис давомида Ҳуқуқни муҳофаза қилиш академиясининг Рақамли криминалистика илмий-тадқиқот институти томонидан ишлаб чиқилган “Катта ҳажмдаги маълумотларни ("BigData") тадқиқ қилиш ва таҳлил этиш” экспертлар учун услубий тавсиялар кўриб чиқиш учун мажлис иштирокчиларига тақдим этилди. Ушбу услубиёт республикамизда мазкур йўналиш бўйича экспертлар учун яратилган илк услубий тавсиялар ҳисобланади.

Муҳокама якуни бўйича Идоралараро кенгаш аъзолари томонидан ушбу услубий тавсияларни Ўзбекистон Республикаси Адлия вазирлигининг Ягона идоралараро услубиётлар реестрига киритиш тўғрисида қарор қабул қилинди.