Академик ва ёшлар учрашуви

2025 йил 16 январь куни Инсон ҳуқуқлари бўйича Ўзбекистон Республикаси Миллий маркази директори, академик Акмал Саидов Академиянинг бакалавриат талабалари, магистратура тингловчилари ва докторантлар билан учрашув ўтказди.

“Академик ва ёшлар” рукнида ўтказилган мазкур учрашувда “Янги Ўзбекистон ва инсон ҳуқуқлари” ҳамда “Халқаро ҳуқуқнинг замонавий тенденциялари” мавзулари муҳокама қилинди. Мазкур тадбир мамлакатда инсон ҳуқуқлари соҳасида амалга оширилаётган ислоҳотларнинг аҳамияти ва ёшларнинг бу борадаги ролини ёритиб беришга қаратилган.

Учрашувда Академик Саидов Янги Ўзбекистоннинг тараққиёт стратегиясида инсон ҳуқуқлари, эркинликлари ва демократияга устувор аҳамият қаратилаётганини таъкидлаб, Ўзбекистоннинг халқаро майдондаги имиджини яхшилаш ва инсон ҳуқуқлари бўйича юқори стандартларга эришишдаги саъй-ҳаракатлари ҳақида маълумот берди. Тадбирда юздан зиёд талаба ёшлар, магистр ва тадқиқотчилар фаол иштирок этди.

Мулоқот давомида жаҳонда кечаётган глобаллашув жараёнлари, инсон ҳуқуқлари соҳасидаги халқаро принциплар ҳамда давлатлараро ҳамкорликнинг аҳамияти ҳақида фикр алмашилди. Академик халқаро ҳуқуқ тизимидаги замонавий ўзгаришлар ва уларнинг инсон ҳуқуқларини таъминлашдаги ўрнига алоҳида эътибор қаратди. Тадбир ёшлар учун билим ва кўникмаларни ошириш, инсон ҳуқуқлари соҳасида илмий-назарий билимларни чуқурлаштириш ва амалиётга йўналтириш учун муҳим қадам бўлди. Шу билан бирга, талабаларга ҳуқуқ соҳасини ўрганишнинг аҳамияти, адабиёт ва ҳуқуқ ўртасидаги узвийлик каби масалаларда ҳам қизиқарли маълумотлар берилди.

Учрашув ёшларнинг инсон ҳуқуқлари ва халқаро ҳуқуқ йўналишидаги салоҳиятини ошириш, уларнинг жамият ва давлат ишларидаги иштирокини янада фаоллаштиришга йўналтирилган муҳим ташаббус сифатида алоҳида аҳамият касб этди.

Тадбир якунида Академик А.Х.Саидов Ўзбекистон Республикаси Ҳуқуқни муҳофаза қилиш академиясининг фаолияти билан танишиб чиқиб, бу ерда илм-фан ва ўқув жараёни учун яратилган шарт-шароитларни юқори баҳолади.