Академияда навбатдаги очиқ эшиклар куни ўтказилди

Ҳуқуқни муҳофаза қилиш академияси – прокуратура ҳамда суриштирув ва тергов фаолиятини амалга ошириш ваколатига эга давлат органлари учун малакали кадрлар тайёрлашга масъул ягона ихтисослаштирилган олий таълим ва илмий-тадқиқот муассасаси бўлиб, ўз фаолиятини очиқ ва шаффоф амалга оширади. Жамоатчилик учун мунтазам равишда тадбирлар, учрашувлар ташкил этилмоқда.

Академиянинг “Тергов фаолияти” бакалавриат таълим йўналишига ўқишга қабулни бошлаш арафасида 16 январь куни Тошкент шаҳридаги ўрта умумтаълим мактабларнинг битирувчилари учун навбатдаги Очиқ эшиклар куни ўтказилди.

Иштирокчилар учун тақдимот ташкил этилиб, Академия бакалавриатига қабул ва ўқув жараёнини ташкил этишнинг ўзига хос жиҳатлари ва афзалликлари бўйича батафсил ахборот берилди.

Академия ўқув биноларида экскурсия ташкил этилиб, меҳмонлар замонавий таълим инфраструктураси билан таништирилди.

Ёшлар криминалистика хонаси, суд имитацияси хонаси, Ахборот-ресурс маркази, coworking маркази, экспертиза лабораторияси, полигон ва бошқа амалий ҳамда вазиятли машғулотлар ўтказиш учун махсус жиҳозланган хоналарни кўздан кечирдилар.

Меҳмонларга академияда таълим олиш имкониятлари, кириш синовлари ва талабалар учун яратилган имкониятлар тўғрисида батафсил маълумот берилди.

Хусусан, Академияга қабул қилишда абитуриентларнинг муайян тоифаларига республиканинг бошқа олий таълим муассасаларига кириш учун қонунчилик ҳужжатларида назарда тутилган имтиёзлар татбиқ этилмайди.

Академия битирувчилари ваколатли давлат органларига хизматга қабул қилинганда фақат офицерлар таркибига кирувчи ёки даражали унвон берилиши кўзда тутилган лавозимларга тайинланади.

Иштирокчилар Академия бакалавриатига қабулни ва таълим жараёнларини ташкил этиш тартибига оид саволларига атрофлича жавоблар олишди.

Академияда очиқ эшиклар куни ўтказиш яхши анъанага айланиб бўлди, бундай тадбирлар тизимли равишда ўтказиб келинади.