Академияда ҳарбий-ватанпарварлик тадбири ўтказилди

Ҳуқуқни муҳофаза қилиш академиясида талаба ёшларни ҳарбий-ватанпарварлик руҳида тарбиялаш мақсадида тизимли ишлар ташкил этилган.

Ўзбекистон Республикаси Қуролли Кучлари ташкил этилганлигининг 33 йиллиги ҳамда 14 январь – “Ватан ҳимоячилари куни” муносабати билан, Ҳуқуқни муҳофаза қилиш академияси томонидан Ўзбекистон Республикаси Миллий гвардияси, Ички ишлар вазирлиги, Фавқулодда вазиятлар вазирлиги билан ҳамкорликда “Янги Ўзбекистон армияси – мамлакат таянчи, ҳалқимиз фахри!” шиори остида ҳарбий-ватанпарварлик тадбири ўтказилди.

Тадбир ёшларда Ватанга бўлган муҳаббат туйғусини шакллантириш, мамлакатимизда ҳар хил соҳаларда, шу жумладан, мудофаа ва хавфсизлик йўналишларида ҳам олиб борилаётган кенг кўламли жараёнларга даҳлдорлик туйғуларини ривожлантириш, уларни касбий тайёргарлиги бўйича билим ва кўникмаларини мустаҳкамлаш, келгуси хизмат фаолиятига тайёрлаш мақсадида ташкил этилди.

Тадбир очилиш маросимида Миллий гвардиянинг алоҳида намунали ҳарбий оркестри ва фахрий қоровул бўлинмаси ўзларининг ватанпарварлик туйғуларини чорловчи садо ва кўргазмали чиқишларини иштирокчилар эътиборига намойиш этдилар.

Асосий ва амалий қисмида эса бугунги кунда Ички ишлар вазирлиги, Фавқулодда вазиятлар вазирлиги ва Миллий гвардиянинг бўлинмаларида мавжуд замонавий техника, қурол-аслаҳаларнинг, шунингдек, тергов ва суриштирув фаолиятида қўлланиладиган криминалистика техника ва махсус воситаларининг кўргазмаси ташкиллаштирилди.

Ўзбекистон Республикаси ИИВ Махсус операцияларни мувофиқлаштириш бошқармаси махсус тайёргарлик ўқув марказининг инструктор кинологлари чиқишлари тадбир иштирокчиларида катта қизиқиш уйғотди.

Талабалар ҳар бир қурол-аслаҳа, махсус техника ва воситаларнинг вазифалари, уларнинг тактик-техник тавсифлари, қисм ва механизмларининг ишлаш принциплари билан тўғридан-тўғри танишдилар ҳамда узларининг қизиқтирган саволларига мутахассислардан жавоблар олдилар.