Академия Ахборот-ресурс маркази имкониятлари кенгаймоқда

Ўзбекистон Республикаси Ҳуқуқни муҳофаза қилиш академияси Ахборот-ресурс маркази базасини бойитиш юзасидан изчил ишлар олиб борилмоқда. Биргина 2024 йил давомида 3000 дан ортиқ миллий ва хорижий адабиётлар харид қилинди. Шунингдек, марказнинг ривожланиши учун ҳамкор ташкилотлар томонидан қатор ўқув, илмий ва бадиий адабиётлар беғараз тақдим этилди. Жумладан, Ўзбекистон ёзувчилар уюшмаси томонидан 500 та адабиёт ва бошқа халқаро ҳамкорлар томонидан 300 га яқин қимматли китоблар марказга тақдим этилди.

Академиянинг доимий ҳамкори – Инсон ҳуқуқлари миллий маркази томонидан Ҳуқуқни муҳофаза қилиш академиясига 200 дан ортиқ ҳуқуқий адабиётлар, дарсликлар ва қўлланмалар беғараз тақдим этилди.

Бу тадбирлар Ахборот-ресурс маркази фаолиятини янада бойитиб, илмий-таълимий жараёнларни қўллаб-қувватлашда катта аҳамият касб этмоқда. Академия раҳбарияти ва жамоаси ушбу ёрдам ва ҳамкорлик учун барча ташкилотларга миннатдорчилик изҳор этади.