Академия Кенгашининг навбатдаги мажлиси ўтказилди

Ҳуқуқни муҳофаза қилиш академияси Кенгашининг навбатдаги мажлиси бўлиб ўтди.

Мажлисда Академия фаолиятига оид бир қатор муҳим масалалар кўриб чиқилди.

Жумладан, Академия тармоқлари томонидан амалга оширилган ишлар танқидий муҳокама қилиниб, йўл қўйилган хато ва камчиликларни бартараф этишга қаратилган аниқ чора-тадбирлар белгилаб олинди.

Шу билан бирга, қонун ҳужжатларида белгиланган муддатларда тадқиқот ишини якунламасдан, низом талабларини бузгани сабабли Академия мустақил изланувчиларининг 32 нафари мустақил изланувчилар сафидан чиқарилиши ҳақида қарор қабул қилинди.

Шунингдек, Академия профессор-ўқитувчилари, таянч докторантлари ҳамда мустақил изланувчилари томонидан тайёрланган ўқув адабиётлари, монографиялар ҳамда тадқиқот натижалари бўйича бошқа ишланмаларни нашрга тавсия этиш масаласи муҳокама қилинди, бир неча ходимлар илмий унвонларга тавсия этилди.

Мажлис кун тартибидаги бошқа масалалар юзасидан ҳам тегишли қарорлар қабул қилинди.