Андижон вилоятида ахборот технологиялари ёрдамида содир этилган жиноятларга қарши кураш аҳволи ўрганилди

Ҳуқуқни муҳофаза қилиш академияси ходимлари томонидан Бош прокуратуранинг Ички ишлар органларида қонунчилик ижроси устидан назорат бошқармаси ходимлари балан биргаликда Андижон вилояти ички ишлар органларида ахборот технологиялари ёрдамида содир этилган жиноят ҳақидаги ариза ва хабарларнинг кўриб чиқилиши, тергов қилиниши, фош этилишининг қонунийлиги ҳамда бу борадаги прокурор назорати аҳволи ўрганилиб, умумлаштирилди.

Ўрганиш вилоят туманларидаги ички ишлар бўлимларига бориб, бу тоифадаги жиноятга оид ариза ва хабарлар бўйича юритилган терговга қадар текшириш материаллари, жиноят ишлари ва бошқа ҳужжатларни бевосита ўрганган ҳолда, шунингдек жиноятнинг янги турлари бўйича айрим жабрланувчи фуқаролар билан суҳбатлашган ҳолда олиб борилди.

Ўрганишда аниқланган қонунбузилиши ҳолатлари текшириш гуруҳи ташаббуси билан бартараф этилиши таъминланди ҳамда бартараф этишнинг имкони бўлмаган тизимли хато ва камчиликлар умумлаштирилди.

Шунингдек, Академиянинг Рақамли криминалистика илмий-тадқиқот институти ходимлари томонидан тезкор-тергов ходимларига ахборот технологиялари соҳасидаги жиноятларга қарши курашиш, рақамли далиллар билан ишлаш ҳамда бу турдаги жиноятларни фош этиш борасидаги кўникмаларини ошириш юзасидан амалий-назарий билим ва кўникмаларини ошириш бўйича тавсиялар берилди.

Текшириш якуни бўйича ахборот технологиялари ёрдамида содир этилган жиноятларнинг содир этилиши усуллари, шарт-шароитлари ва тоифаларининг рўйхати шакллантирилди ҳамда келгусида ушбу йўналишда содир этилиши мумкин бўлган жиноятларнинг барвақт олдини олиш бўйича таклифлар ишлаб чиқиш мақсадида умумлаштирилди.