Терговчилар учун электив курсга старт берилди

Ҳуқуқни муҳофаза қилувчи органларнинг суриштирув ва тергов тузилмалари ходимлари учун электив малака ошириш курси бошланди.

Ўқув курси Академиянинг ахборот-таълим портали негизида масофавий шаклда ташкил этилган. Мазкур курсда Ички ишлар вазирлиги, Миллий гвардия, Давлат божхона қўмитасининг 110 нафардан ортиқ терговчи ва суриштирувчи ходимлар иштирок этмоқда.

Электив курс мақсади тингловчиларнинг жиноят ва ҳодиса бўйича бирламчи ҳаракатларни амалга ошириш, ҳодиса жойини кўздан кечириш, бедарак йўқолган шахсни қидириш, пора олиш ва қасддан одам ўлдириш жиноятларини тергов қилиш усуллари борасидаги билим ва кўникмаларини ривожлантиришга қаратилган.

Мазкур курсда таҳсил олиш тингловчиларнинг жиноятларни тергов қилиш методикаси ва тактикасини самарали белгилаш асосида жиноят ишлари бўйича мустақил иш юритиш кўникмаларини ривожлантиришга хизмат қилади.