Ҳуқуқни муҳофаза қилувчи органларда хизмат қилаётган аёллар билан учрашув

Академия бакалавриатида “Тергов фаолияти” ва “Прокурорлик фаолияти” йўналишлари бўйича таҳсил олаётган талаба-қизлар учун Ўзбекистон Республикаси Ички ишлар вазирлиги, Миллий гвардияси, Божхона қўмитаси ҳамда прокуратура тизимларида хизмат қилиб келаётган тажрибали ҳарбий хизматчи ва ходима аёл офицерлар билан учрашув ташкил этилди.

Ушбу тадбир талаба-қизларнинг касбий тайёргарлиги бўйича билим, кўникма ва малакаларини шакллантириш ва ривожлантириш, келгуси хизмат фаолиятига тайёрлаш ҳамда хизматга бўлган қизиқишларини орттириш, ўз касбига бўлган иштиёқини ошириш мақсадида ташкиллаштирилди.

Тадбир давомида замонавий аёл ходим имиджи хусусида фикрлар билдирилди, меҳмонларимиз ҳуқуқни муҳофаза қилувчи органларда амалга оширилаётган ислоҳотлар, ҳарбий хизматчи ва ходима аёлларни тизимлардаги ўрни ва роли, хизмат вазифаларини бажаришдаги ўзига хос хусусиятларининг мазмун-моҳиятини тушунтириш билан бир қаторда ўзларининг нафақат хизмат фаолиятлари давомидаги таассуротлари ҳақида сўзлаб бердилар, балки босиб ўтган ҳаётий тажрибалари билан ўртоқлашдилар. Ходима аёлларимиз ёшларимизнинг саволлари ва уларни қизиқтирган масалалари юзасидан ўз фикр ва мулоҳазаларини билдирдилар.

Бу каби учрашувлар талабаларимизни касбий фаолиятидан фахрланиш, уларда масъулият ва садоқат туйғуларини шакллантиришда муҳим ўрин тутади. Қизларимиз келгусида шарафли ва муқаддас касб соҳибалари бўлишларида муҳим мотивация манбаси бўлиб хизмат қилади.