Идоралараро ҳамкорлик доирасидаги навбатдаги тадбир

Ҳуқуқни муҳофаза қилиш академияси ҳуқуқни муҳофаза қилиш фаолиятининг турли соҳаларида илмий тадқиқот фаолиятини ривожлантиришга қаратилган тизимли ишларни олиб бормоқда. Мамлакатимизнинг илмий ва таълим муассасалари билан мустаҳкам алоқалар ўрнатилиб, Академиянинг илмий тадбирларида юқори малакали олимлар, экспертлар ва катта иш тажрибасига эга амалиётчилар иштирок этиб келмоқда.

Академияда ўтказилган навбатдаги илмий семинарда Тошкент давлат юридик университети профессорлари ҳамда прокуратура органларининг фахрий ходимлари иштирок этдилар.

Илмий муҳокамалар жараёнида иштирокчилар илмий ва ҳуқуқни қўллаш амалиётидаги долзарб масалаларни муҳокама қилиб, тегишли таклифлар ва тавсиялар билдирдилар.

Меҳмонлар шунингдек прокуратура ва тергов органлари ходимларини тайёрлаш, қайта тайёрлаш ва малакасини ошириш, илғор технологиялар ва ёндашувлар асосида таълим жараёнини ташкил этиш, замонавий ўқув инфратузилмаси ва профессор-ўқитувчилар, талаба ва тингловчилар учун яратилган шароитлар билан танишдилар.

«Coworking» марказида бакалавриат талабалари билан фахрий меҳмонлар ўртасида учрашув бўлиб ўтди. Ушбу учрашувда меҳмонлар ўз тажрибалари билан ўртоқлашиб, келажакда ҳуқуқни муҳофаза қилиш соҳасида ишлайдиган ходим учун зарур бўлган шахсий ва касбий сифатлар ҳақида суҳбатлашдилар.