“Ёқилғи-энергетика соҳасида давлат назоратини такомиллаштириш масалалари” курси бошланди

Ҳуқуқни муҳофаза қилиш академиясида Бош прокуратура билан ҳамкорликда ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича Республика штаби аъзолари иштирокида “Ёқилғи-энергетика соҳасида давлат назоратини такомиллаштириш масалалари” мавзусида қисқа муддатли ўқув курси бошланди.

Ўқув курси тингловчилари таркиби Ички ишлар вазирлиги ходимлари, “Ўзэнергоинспекция”, “Ўзнефтегаз”, “Миллий электр тармоқлари”, “Иссиқлик электр станциялари”, “Ҳудудий электр тармоқлари”, “Ҳудудгазтаъминот” акциядорлик жамиятлари мутахассислари ҳамда олий таълим муассасаларининг профессор-ўқитувчиларидан иборат.

Ўқув машғулотлари Бош прокуратура ва Академия ходимлари, юқоридаги вазирлик ва идораларнинг мутахассислари томонидан олиб борилиб, ўқув дастури ёқилғи-энергия ресурсларидан фойдаланиш устидан давлат назоратини ташкил этиш ва мувофиқлаштириш бўйича штаблар фаолиятини ташкил этиш, уларнинг асосий вазифалари, ёқилғи-энергия ресурсларидан ноқонуний фойдаланиш, талон-торож қилиш ҳолатларини олдини олиш, бартараф этиш, энергия ресурсларини узатиш ва тақсимлашдаги технологик йўқотишларнинг олдини олиш, энергия ресурсларини иқтисод қилиш борасидаги ишларни ташкил этиш, энергетика соҳасини рақамлаштириш орқали ривожлантириш истиқболлари каби масалаларни қамраб олган назарий ва амалий машғулотлар назарда тутилган.

Мазкур курс натижаларига кўра, тингловчилар орасидан мураббийлар жамоаси шакллантирилиб, гуруҳларга бўлинган ҳолда ҳудудий ва туман-шаҳар штаблари аъзоларининг малака ҳамда касбий кўникмаларини оширишга қаратилган сайёр семинар машғулотлари ташкил этилиши режалаштирилган.