БМТнинг Наркотиклар ва жиноятчилик бўйича бошқармаси билан коррупцияга қарши кураш соҳасида ҳамкорликни мустаҳкамлаш

Бош прокуратура Академияси фаолиятига хорижий мутахассисларни жалб қилиш доирасида жорий йилнинг 18-22 ноябрь кунлари Академияга БМТнинг Наркотиклар ва жиноятчилик бўйича бошқармасининг коррупцияга қарши кураш чора-тадбирлари соҳасидаги эксперти Константин Поликарскининг ташрифи ташкил этилди.

Эксперт Академиянинг фаолияти, ўқув жараёнининг ташкил этишдаги ёндашув, Академияда яратилган Коррупцияга қарши курашиш илмий-таълим маркази ва Жиноятларни содир этилиши сабабларини тизимли таҳлил қилиш ва ўрганиш марказининг иши билан танишиб чиқди.

Ташриф давомида К.Поликарски марказларнинг салоҳиятини кўтариш, ўқув модулларини тайёрлаш, Коррупцияга қарши кураш бўйича республика идоралараро комиссиянинг фаолиятига кўмаклашиш, коррупцияга қарши курашиш бўйича ўрта муддатли истиқбол учун мўлжалланган дастур лойиҳасини тайёрлаш юзасидан консультатив маслаҳатлари билан кўмак берди.

Экспертнинг Академия раҳбарияти билан учрашувлар ташкил этилиб, унда ҳамкорликнинг ҳолати ва истиқболлари муҳокама қилинди, ўзаро манфаатга эга бўлган ҳамкорликдаги йўналишлар бўйича келишувларга эришилди.

Шунингдек, Коррупцияга қарши курашиш бўйича республика идоралараро комиссия бошчилигида Академия негизида К.Поликарски томонидан бошқа хорижий мутахассислар билан биргаликда коррупцияга қарши курашиш масалаларида турли мақсадли гуруҳлар учун мўлжалланган серияли тренинглар ўтказилди.