Илк маротаба “Инсон ҳуқуқларига оид халқаро ҳуқуқ” изоҳли луғати нашр этилди

Инсон ҳуқуқлари ва халқаро ҳуқуқ масалалари бўйича ўқув жараёнини услубий таъминлаш мақсадида ҳуқуқшунослик тарихида илк маротаба “Инсон ҳуқуқларига оид халқаро ҳуқуқ” номли изоҳли луғат нашр этилди.

Ушбу изоҳли луғат инсон ҳуқуқларига оид халқаро ҳуқуқнинг энг муҳим тушунчалари, принциплари, нормалари, институтлари ва концепцияларининг мазмун-моҳиятини қисқача баён қилган атамалардан иборат.

Изоҳли луғатнинг материаллари шартномавий-ҳуқуқий актлар, халқаро ташкилотлар ва замонавий амалиёт ҳужжатларига асосланган бўлиб, нафақат махсус атамалар, балки ҳуқуқни қўллаш амалиёти ва юридик фаннинг бошқа соҳаларида ҳам кенг қўлланиладиган сўзларни қамраб олган.

Мазкур нашрнинг ўзига хослиги шундаки, унда янги таҳрирдаги Конституциямизда учрайдиган бир қатор тушунчаларга ҳам кенг изоҳ берилган бўлиб, фойдали манбалар ҳақидаги маълумотлар QR код шаклида илова қилинган.

1 300 дан ортиқ юридик атамаларни ўзида жамлаган изоҳли луғат олий юридик таълим ва илмий-тадқиқот муассасалари профессор-ўқитувчилари, тадқиқотчилари, талабалари, ҳуқуқни муҳофаза қилувчи органлар ходимлари, судьялар, адвокатлар, шунингдек инсон ҳуқуқлари ҳамда халқаро ҳуқуқий муносабатлар муаммоларига қизиқувчи кенг китобхонлар оммаси учун мўлжалланган.

Нашр учун масъул муҳаррир академик А.Х. Саидов раҳбарлигида тайёрланган ушбу изоҳли луғат Ўзбекистон Республикаси Ҳуқуқни муҳофаза қилиш академияси, Инсон ҳуқуқлари бўйича Ўзбекистон Республикаси миллий маркази ва Наманган давлат университетининг профессор-ўқитувчиларининг қўшма илмий-тадқиқот доирасидаги ҳамкорликнинг маҳсули ҳисобланади.