ИИВ академияси магистрантлари учун ўқув машғулотлари ташкил этилди

Ўзбекистон Республикаси Ҳуқуқни муҳофаза қилиш академиясида Ички ишлар вазирлиги академияси магистратураси тингловчилари учун ўқув машғулотлари ташкил этилди.

Машғулотларда Ички ишлар вазирлиги академияси магистратураси “Ташкилий-тактик бошқарув” мутахассислигининг 43 нафар тингловчиси ўз билим ва малакаларини оширди.

Тингловчиларга ички ишлар органларида қонунчилик ижроси устидан прокурор назоратининг ўзига хос хусусиятлари, рақамли криминалистика, рақамли далилларни қайд этиш, мобил қурилмалар криминалистикасига оид батафсил маълумотлар берилди.

Шунингдек, тингловчилар ҳуқуқни муҳофаза қилиш органлари учун кадрлар тайёрлаш, қайта тайёрлаш ва уларнинг малакасини ошириш юзасидан Академияда жорий этилган таълим дастурлари, шунингдек, киберлаборатория, криминалистик полигон, криминалистик лаборатория, суд имитацияси зали ҳамда бошқа амалий ва симуляцион ўқув машғулотларини ўтказиш имконини берадиган замонавий таълим инфратузилмаси билан таништирилди.

Машғулотлар якунида иштирокчилар Академияда ташкил этилган Рақамли криминалистика илмий-тадқиқот институти фаолиятига оид тақдимот билан танишдилар.