Прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш танловининг иккинчи босқичи бошланди

Ўзбекистон Республикаси Бош прокурорининг 2019 йил 16 декабрдаги 1353-сонли буйруғи билан тасдиқланган Ўзбекистон Республикаси Бош прокуратураси Академиясида 2019/2020 ўқув йилида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш танловини ўтказиш тартибига мувофиқ, Бош прокуратура Академиясида жорий йилнинг 25 май куни танловнинг иккинчи босқичи бошланди.

Масофавий қайта тайёрлаш курси шаклида ташкил этилган танловнинг биринчи босқичида юқори натижаларга эришган 50 нафар номзодлар иккинчи босқичга жалб этилди.

Ушбу босқич бўйича дастлабки масофавий ўқув машғулоти аудиоселектор шаклида ташкил этилиб, мазкур машғулотда Академия раҳбарияти, қайта тайёрлаш курси ҳамда масофадан ўқитишга масъул ходимлар иштирок этишди. Аудиоселекторда танловнинг иккинчи босқичини ўтказиш тартиби, босқичлари, масофадан малака ошириш жараёнини олиб боришнинг тартиб-қоидалари, техник ва технологик жиҳатлари, шунингдек, ўқув жараёни ва назорат турлари ҳақида батафсил тушунтирилди.

Иккинчи босқич бир ой давомида амалга оширилиб, масофавий курснинг дастури қонунчилик ижроси устидан прокурор назорати, жиноятчиликка қарши курашиш ва ҳуқуқбузарликлар профилактикаси, судларда прокурорлик ваколатини таъминлаш, прокурорлик фаолиятини ташкил этиш ва бошқариш, иқтисодий жиноятчиликка қарши курашиш ҳамда бошқарув ва менежмент асослари масалларини ўз ичига олган 5 та ўқув блокларидан иборат. Ушбу курс номзодларда мамлакатимизда амалга оширилаётган ислоҳотлар, замонавий бошқарув, қарор қабул қилиш борасидаги билим ва кўникмаларини, шунингдек шахсий, ишчанлик сифатларини такомиллаштиришга йўналтирилади.

Курс давомида ҳар бир номзодга ўз иш фаолиятидан келиб чиқиб тақдимот (таҳлилий иш, норматив-ҳуқуқий ҳужжат лойиҳаси, амалий қўлланма ва ҳ.к.) тайёрлаш топшириғи берилади.

Курс якуни бўйича номзодларнинг ўқитилган масофавий курс ўқув блоклари бўйича билим даражасини аниқлашга қаратилган онлайн тарздаги якуний имтиҳонлар ўтказилади ва натижалари баҳоланади.