Темурийлар тарихи давлат музейига маърифий экскурсия ташкил этилди

“Биз – соҳибқирон Амир Темур авлодимиз!” тамойили асосида ёшларда тарихий хотирани мустаҳкамлаш, уларда миллий ғурур ва ватанпарварлик туйғуларини шакллантириш мақсадида Ўзбекистон Республикаси Ҳуқуқни муҳофаза қилиш академияси бакалавриати “Прокурорлик фаолияти” йўналиши 1-курс талабалари учун Темурийлар тарихи давлат музейига маърифий экскурсия ташкил этилди.

Экскурсия давомида талабалар Музейда намойиш этилган нодир экспонатлар, тарихий ҳужжатлар, макетлар ва интерактив панелларни кўздан кечириб, буюк саркарда ва давлат арбоби Амир Темур ҳамда Темурийлар сулоласининг бой мероси, уларнинг давлат бошқаруви, илм-фан, маданият ва ҳарбий соҳадаги ютуқлари билан яқиндан танишдилар.

Ташриф давомида талабалар тарихий манбаларни кўздан кечирибгина қолмай, Амир Темур шахсиятининг жаҳон тарихидаги ўрни, унинг “Тузуклари”да акс этган ғоялар ва Темурийлар давридаги тараққиёт ҳақида ҳам батафсил маълумотларга эга бўлишди. Экскурсия якунида очиқ мулоқот ўтказилиб, талабалар ўзларини қизиқтирган саволларига жавоб олишди.

Ушбу ташаббус ёшларнинг тарихий меросга ҳурмат руҳида тарбияланиши, уларнинг ижтимоий фаоллигини ошириш ва маънавий-маърифий билимларини бойитишга хизмат қилади.