“Ёш китобхон” клубига аъзо талабалар маърифий тадбирда иштирок этди

Ҳуқуқни муҳофаза қилиш академиясида таҳсил олаётган талабалардан ташкил топган “Ёш китобхон” клуби аъзолари Ўзбекистон Ёзувчилар уюшмасида ташкил этилган маърифий тадбирда иштирок этдилар.

Тадбир доирасида ёзувчилар, адабиётшунослар ва китобхон ёшлар ўртасида очиқ мулоқот ташкил этилди. Унда замонавий ўзбек адабиёти, бадиий ижод, ёшлар ўртасида китобхонлик маданиятини ошириш масалалари муҳокама қилинди. Шунингдек, муаллифлар ўз асарларидан парчалар ўқиб эшиттирдилар, иштирокчилар эса ўзларини қизиқтирган саволлар билан мурожаат қилиш имконига эга бўлдилар.

“Ёш китобхон” клуби аъзолари мазкур тадбирда қатнашиш орқали нафақат адабиёт оламидаги янгиликлар билан яқиндан танишдилар, балки маънавий бойлик ва эстетик таълим олиш имкониятига ҳам эга бўлдилар.

Маърифий учрашув талабаларда юрт тарихига, адабиётига ва маънавий меросига бўлган қизиқишни янада оширди. Бундай тадбирлар, шубҳасиз, келажак ҳуқуқшуносларини ҳар томонлама етук, интеллектуал салоҳиятли ва маънавий жиҳатдан бой шахс сифатида шакллантиришга хизмат қилади.