Талабалар жамоаси халқаро танловда иштирок этди

Ўзбекистон Республикаси Ҳуқуқни муҳофаза қилиш академиясининг “Кратос” жамоаси жорий йилнинг 21-25 апрель кунлари Москва шаҳрида ўтказилган “Халқаро гуманитар ҳуқуқ” бўйича Ф.Ф.Мартенс номидаги ХХVI юбилей танловининг финал босқичида иштирок этди.

Ф.Ф.Мартенс номидаги танлов халқаро гуманитар ҳуқуқ нормаларини қуролли можаролар шароитида қўллаш бўйича талабалар ўртасида ўтказиладиган етакчи халқаро майдончалардан бири ҳисобланади. Ҳар йили мазкур танловда турли давлатларнинг етакчи юридик олий таълим муассасалари жамоалари иштирок этади.

Жорий йилда саралаш босқичи натижаларига кўра мусобақада Арманистон, Беларус, Қозоғистон, Қирғизистон, Россия, Тожикистон, Туркманистон ва Ўзбекистондан 28 та жамоа иштирок этди.

"Кратос" жамоаси юқори даражада тайёргарлик, халқаро гуманитар ҳуқуқ соҳасида чуқур билим, шунингдек, ҳуқуқий таҳлил ва аргументация бўйича мукаммал маҳоратини намойиш этди.

Танлов давомида иштирокчилар мураккаб амалий вазифаларни муваффақиятли бажариб, муносиб тарзда иштирок этди.