Қуролли кучлар академияси тингловчилари учун навбатдаги ўқув курси ташкил этилди

Ўзбекистон Республикаси Қуролли кучлари академияси магистратура мутахассислиги тингловчилари иштирокида Ҳуқуқни муҳофаза қилиш академиясида қисқа муддатли малака ошириш курси ташкил этилди.

Мудофаа вазирлиги тизимининг турли бўғинларида фаолият олиб бораётган офицерлар “Оператив стратегик бўғим” ҳамда “Давлат ва ҳарбий бошқарув” йўналишлари бўйича ўз билим ва малакаларини оширдилар.

Унда тингловчиларга Ўзбекистон Республикасида мудофаа соҳасида олиб борилаётган сиёсатнинг асосий йўналишлари, қуролли кучларда қонунбузилиши ҳолатлари ва қонунлар ижроси устидан прокурор назорати, ҳарбийлар ўртасида ҳуқуқбузарликлар профилактикаси, раҳбар фаолиятида коммуникатив компетентлилик, лидерлик психологияси, конфликтли вазиятлар ва уларни бошқариш имкониятлари бўйича асосий билимлар берилиб, қонунчилик асослари тушунтирилди.

Шунингдек, Ўзбекистон Республикаси қуролли кучларида жиноятга оид ариза, хабар ва бошқа маълумотлар юзасидан ўтказилаётган терговга қадар текширувларда аниқланаётган қонунбузилиш ҳолатлари ва уларни бартараф этиш чоралари ўргатилди.

Курс натижаси бўйича тингловчиларга белгиланган тартибда махсус сертификатлар тақдим этилди.