Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) ўз иш фаолиятини бошлади

2018 йилнинг 22-23 ноябрь кунлари Астана шаҳрида Ғарбий ва Марказий Осиё давлатларининг активларни қайтариш бўйича норасмий тармоғини ташкил этиш юзасидан экспертларнинг тўртинчи минтақавий учрашуви ўтказилиб, унда Ўзбекистон Республикаси Бош прокуратураси Академияси ва Департаменти ходимлари иштирок этишди.

Тадбирда Марказий осиё минтақаси ҳамда Афғонистон ва Покистон давлатларининг прокуратура, ички ишлар, молиявий жиноятларни суриштириш ва тергов қилиш органлари ва бошқа ваколатли ташкилотлари ходимлари, шунингдек Бирлашган Миллатлар Ташкилотининг Наркотик моддалар ва жиноят бошқармаси, Европа Иттифоқи, Европа (CARIN), Жанубий Африка (ARIN-SA), Осиё-Тинч океани (ARIN-AP) тармоқларининг экспертлари қатнашишди.

Тадбир давомида иштирокчилар ва экспертлар ўзларининг презентацияларини намойиш этишиб, қонунчилик юзасидан таҳлилларини ва активларни қайтариш бўйича реал мисолларни келтиришди ҳамда бу соҳада ўз тажрибалари билан алмашишди. Шу билан бирга учрашув иштирокчилари жиноятчиларни уларнинг ноқонуний активларидан маҳрум қилишда хатти-ҳаракатлар самарадорлигини ошириш мақсадида Ғарбий ва Марказий Осиё давлатларининг активларни қайтариш бўйича норасмий тармоғини ташкил этиш долзарблигини қайд этиб ўтишди.

Учрашув якунлари бўйича иштирокчилар Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) ўз иш фаолиятини ташкил этганлигини эълон қилишди ва бошқа талабгор давлатлар орасидан Ўзбекистон Республикаси Бош прокуратураси бошчилигида Тошкентда доимий фаолият олиб борувчи ARIN-WCA тармоғининг Котибиятини ташкил этиш тўғрисидаги ташаббусини бир овоздан қўллаб қувватладилар.

Тадбир ташкилотчилари ҳамда бошқа тармоқларнинг экспертлари ARIN-WCA тармоғининг ўз иш фаолиятини бошлаганлиги ва Ўзбекистон Республикаси Бош прокуратураси Академиясини мазкур тармоқнинг доимий Котибияти функциясини олиб бориши билан қутладилар.

Иштирокчилар ARIN-WCA тармоғи доирасида фаол ҳамкорлик қилишга ва уни ривожлантиришга тайёр эканликлари билдиришди.