“Жиноят ишлари бўйича замонавий одил судловнинг долзарб вазифалари: Ўзбекистон Республикаси ва Германия Федератив Республикаси тажрибаси” мавзусидаги юбилей конференцияси

2018 йилнинг 14 ноябрь куни Бош прокуратура Академияси ва Германия халқаро ҳуқуқий ҳамкорлик жамғармаси (IRZ) томонидан жамғарманинг Ўзбекистондаги фаолиятини 10 йиллигини нишонлашга бағишланган тадбирлар доирасида “Жиноят ишлари бўйича замонавий одил судловнинг долзарб вазифалари: Ўзбекистон Республикаси ва Германия Федератив Республикаси тажрибаси” мавзусидаги конференция ўтказилди.

Тадбирда ГФР Адлия ва истеъмолчилар ҳуқуқларини ҳимоя қилиш вазирлиги қошидаги парламент статс-котиби Кристиан Ланге, ГФРнинг Ўзбекистон Республикасидаги Фавқулодда ва Мухтор элчиси Гюнтер Оверфельд, IRZ фондининг Берлин ваколатхонаси ва Осиё бўйича лойиҳалар раҳбари Ангела Шмайнк, Шлезвиг-Гольштейн федерал ери бош прокуроратураси катта прокурори Георг-Фридрих Гюнтге, Германиядаги жиноий ҳуқуқ соҳасидаги етакчи адвокат, Пассау шаҳар Университети профессори, доктор Михаэл Тсамбикакислар иштирок этди.

Шунингдек, тадбирда Ўзбекистон Республикаси Бош прокуратураси, Адлия вазирлиги, Олий Мажлис Қонунчилик Палатаси, IRZ жамғармасининг Тошкентдаги вакиллари ҳамда Ўзбекистон Республикаси жиноят ва жиноят-процессуал қонунчилигини такомиллаштириш бўйича ишчи гуруҳ аъзолари, Бош прокуратура Академияси профессор-ўқитувчилари иштирок этди.

Ўзбекистон Республикаси Бош прокурорининг биринчи ўринбосари Э.Таджиев табрик сўзи билан чиқиб, IRZ жамғармасининг мамлакатда олиб борилаётган ислоҳотлардаги кўмаги ҳамда Бош прокуратура Академияси салоҳиятини ривожлантиришга қўшаётган ҳиссаси ҳақида алоҳида тўхталиб ўтди.

Тадбир давомида Германия ва Ўзбекистоннинг жиноят процессида инсон ҳуқуқлари ҳимоясини таъминлаш, жиноят ишларини тергов қилиш ва судда кўриш жараёнида ҳимоячининг роли, жиноят ишларини кўриб чиқишнинг соддалаштирилган ва тезлаштирилган тартиби, жиноят процесси ҳамда тергов органлари ишини рақамлаштириш каби масалалар муҳокама қилинди.

Конференция Ўзбекистон Республикаси ва Германия Федератив Республикаси жиноят ва жиноят-процессуал қонунчилиги соҳасида тажриба алмашиш учун платформа бўлиб хизмат қилди.