“Инновация ва илм-фан: магистрлик тадқиқотлари” илмий мақолалар тўплами нашр этилди

Ҳуқуқни муҳофаза қилиш академияси магистратураси тингловчилари томонидан “Инновация ва илм-фан: магистрлик тадқиқотлари” мавзусидаги илмий мақолалар тўплами нашр этилди.

Мазкур тўпламда Академияда таҳсил олаётган магистрантларнинг ҳуқуқни муҳофаза қилиш соҳасидаги илмий изланишлари, амалий тавсиялари ҳамда амалга оширилаётган ислоҳотларга оид таҳлилий ёндашувлари жамланган бўлиб, мамлакатда қонунийлик, қонун устуворлигини таъминлаш ҳамда инсон ҳуқуқларини ҳимоя қилишга  доир жараёнларни янада такомиллаштиришга қаратилган илмий-амалий тавсиялар жамланган. 

Шунингдек, тўпламни тайёрлашдан кўзланган асосий мақсад – магистрантлар томонидан олиб борилган илмий тадқиқотлар натижаларини тарғиб қилиш, академик муҳокамалар учун очиқ илмий майдон яратиш, юриспруденция соҳасида инновацион ёндашувларни ривожлантириш ҳамда жамиятда ҳуқуқий онг ва маданиятни юксалтиришга кўмаклашишдан иборатдир.

Ушбу тўплам суд-ҳуқуқ соҳасида амалга оширилаётган институционал ислоҳотларни илмий жиҳатдан асослаш, ҳуқуқни муҳофаза қилиш органлари фаолияти самарадорлигини ошириш, шунингдек, ҳуқуқий соҳада кадрлар салоҳиятини ривожлантиришда муҳим амалий аҳамиятга эгадир.