Прокуратура органлари ходимлари учун ЮНЕСКО минтақавий тренинглари ўтказилди

Ҳуқуқни муҳофаза қилиш академияси томонидан ЮНЕСКОнинг Ўзбекистондаги ваколатхонаси билан ҳамкорликда Андижон, Наманган ва Фарғона вилояти прокуратура органлари ходимлари учун “Сўз эркинлиги ва ахборотдан фойдаланиш ҳамда журналистларга нисбатан содир этилган жиноятларни тергов қилиш” мавзусида тренинг ўтказилди.

Тренинг журналистик фаолиятини муҳофаза қилиш, сўз ва ахборот олиш эркинлигини таъминлаш соҳасида катта тажрибага эга бўлган Канадалик халқаро эксперт Сабин Оуэллет томонидан ўтказилди.

Тренингда вилоят прокуратуралари ходимлари, хусусан, вилоят прокурорининг жамоатчилик билан алоқалар ва ҳуқуқий ахборот бўйича катта ёрдамчиси, бўлим прокурорлари, туман-шаҳар прокурорларининг ёрдамчилари ва терговчилари иштирок этишди.

Тадбир иштирокчиларига эксперт томонидан сўз эркинлиги ҳуқуқи ва унинг демократик жамият қурилишидаги аҳамияти, сўз эркинлигини қонуний чеклаш, ахборот олиш эркинлигининг кафолатлари, халқаро стандартлар талаблари ва илғор хориж тажрибаси ҳақида тушунтиришлар берилди.

Шунингдек, журналистларга қарши содир этилган жиноятлар бўйича дастлабки терговни амалга оширишнинг усул ва механизмлари атрофлича ёритилди.

Иштирокчиларга сертификатлар топширилди.